Fa isika izay matanjaka dia tokony hitondra ny fahalemen’ny malemy ka tsy hitady izay hahafaly ny tenantsika ihany. (Romana 15:1)

Ry havana,

Efa-taona izao no nimasohana teto anivon’ny FPMA, mba ho laharam-pahamehana ny hamelomana ny Mpitandrina amin’ny Tafo FPMA sy Faritany FPMA rehetra ary FPMA manontolo, ka hahamatihanina azireo. Fanamby lehibe napetratsika izany taorian’ny Synoda Lehibe FPMA faha-XXXI, 2006 tany Orléans. Betsaka ny vita satria raha telo ny Mpitandrina matihanina talohan’ny 2006 (Pasitera Synodaly, Tafo Paris, Tafo La Réunion), dia niampy valo izany ankehitriny, rehefa niroso ny Tafo Aix-Marseille, Toulouse, Grands-Champs, Lille, Lyon, Poitiers, Fihobiana ary ny Fandrindrana ny Faritra Afovoany Andrefana.

Ny ezaka ataontsika eny anivon’ny Tafo sy Faritany dia tena zava-dehibe ary mbola anentanana antsika rehetra hatrany ny hanohizana izany. Kanefa mbola maro ireo Tafo mangetaheta fatratra ny hanana Mpitandrina matihanina hiahy ny ondrin’Andriamanitra any amin’izy ireny. Ary izay no anentanana antsika indrindra ihany koa. Ka hifarimbona isika mba tsy hamely irery ireo Tafo izay mety ho marefo ara-bola na mety ho bitika noho ny isan’ny Mpikambana ao aminy. (…)

Ity tranonkala ity, natokana ho an’ny fitrandrahana ny momba ny Mpitandrina matihanina eto anivon’ny FPMA manontolo, ny Faritra sy ny Tafo FPMA rehetra, dia mikendry tanjona roa. Ny voalohany dia ny hifampitantanana amin’ny tompon’andraikitra isan-tokony sy ny vahoakan’Andriamanitra ho amin’ny ezaka fananana Mpitandrina matihanina. Ny faharoa dia ho fijoroana vavolombelona ny amin’ny maha-lehibe ny asa misionan’ny FPMA sahanina amin’ny tanjona fananana Mpitandrina matihanina.

Natao ho tsotra ihany moa ny fampiasana ity tranonkala ity. Hita ato àry ny làlana nodiavina hatrizay ary ireo sori-dàlana heverina fa tsara harahina. Misy firaiketana koa ato ahitana tatitra, fanambarana, … mikasika ny tanjona hananana Mpitandrina matihanina eto amin’ny FPMA. Hisokatra afaka fotoana fohy ny pejy natokana ho an’ny dinika teknika (famolavolana ireo antonta-taratasy ara-panjakana, ny fifanarahana ifanaovana amin’ny Mpitandrina, …). Etsy andanin’ireo dia misy ny fizarana trainkefa samihafa mikasika ny tanjona fananana Mpitandrina matihanina, ny vaovao samihafa avy amin’ny FPMA, …

Eto am-pamaranana dia mbola mamerina ny fiarahabana tonga soa sady mirary ny soa indrindra. Ho an’Andriamanitra irery anie ny voninahitra.